NIZHALPOLE. (malayalam poem) - ANWAR SHAH UMAYANALLOOR - നിഴല്‍പോലെ (മലയാളകവിത) അന്‍വര്‍ ഷാ ഉമയനല്ലൂര്‍

കവിത               അന്‍വര്‍ ഷാ ഉമയനല്ലൂര്‍

Poem              Anwar Shah Umayanalloor

നിഴല്‍പോലെ

ഒരു ശോകശ്ലോകമായിന്നെന്റെമുന്നില്‍ നീ-

യെന്തിനായ് വന്നു മിഴിതുടച്ചു;

ഇഴകളകന്നുപോകുന്നയീ ജീവിത-

പ്പുടവയിന്നഴലാല്‍പ്പൊതിഞ്ഞുവച്ചു ?

തിരികേയൊരുകടലേകുവാനെങ്കില്‍ നീ-

യെന്തേ തൃസന്ധ്യ തിരഞ്ഞെടുത്തു

താനേയടഞ്ഞുപോകുന്നയീ വാതിലിന്‍

ചാരെയൊരുനീഴലായിനിന്നു ?

നിറമാര്‍ന്ന ചാറ്റല്‍മഴനാം പരസ്പരം

പങ്കിട്ടു പണ്ടെത്രയാസ്വദിച്ചു

പക്ഷെ-നീ-യിന്നീപ്പെരുമഴയൊറ്റയ്ക്കു

നന്നായ്‌പ്പൊതിഞ്ഞു മറന്നുവച്ചു.

തീരാക്കടംകഥപോലെന്‍ കനവുകള്‍-

ക്കുളളില്‍നീയൊരുചോദ്യമായിനില്‍ക്കേ,

സത്യത്തിലീമനമറിയാതെയൊരുകനല്‍

ക്കൂനയായ്‌ത്തീരുകയായിരുന്നു.

ഒരുകുഞ്ഞുപക്ഷിയോടിന്നെന്റെയുളളിലെ-

ക്കരയുന്ന നിളതന്‍ കഥപറഞ്ഞു

തിരിയാതെയീഗ്രീഷ്മചക്രമെന്‍ ഹൃത്തുപോ-

ലറിയാതെ നിന്‍വിധിയോര്‍ത്തുനിന്നു.

മകളെന്ന മുകുളം മലരായിമാറുവാന്‍

നാളുകളെത്രഞാന്‍ കാത്തിരുന്നു

തളരാതെയിക്കാലമത്രയും നോവിന്റെ-

വേനല്‍ക്കുടിച്ചു സഹിച്ചുനിന്നു.

ഹൃത്താളമിടറിയ രാവൊന്നില്‍ ജീവന്റെ-

നാളം കെടുത്താന്‍ തുനിഞ്ഞിരുന്നു

ഇന്നുമീ സന്ധ്യയ്ക്കതിന്നായൊരുങ്ങവേ-

യിങ്ങുനീ-കാവ്യമായൊഴുകിവന്നു.

http://umayanalloor.blogspot.com